ཕྱི་ལོ་ ༢༠༡༥ ཟླ་ ༡༠ ཚེས་ ༢༧ རེས་གཟའ་མིག་དམར།
༄༅། །འདི་གར་དབུས་འོས་བསྡུ་ལས་ཁང་ནས་བཏང་གནས་ནང་འཁོད་དོན། བོད་དོན་རྒྱབ་སྐྱོར་བ་རྣམ་པས་ཐོག་མཐའ་བར་གསུམ་དུ་བོད་མིའི་རྩ་དོན་ཐད་འགན་ཁུར་ཞུས་དང་ཞུ་མུས་ལ་སྙིང་ནས་བསྔགས་བརྗོད་དང་ཐུགས་རྗེ་ཆེ་ཞུ་རྒྱུ་ཡིན། འོན་ཀྱང་ད་ལམ་བོད་དོན་རྒྱབ་སྐྱོར་བ་ཁག་ཅིག་གི་མཚན་ཐོག་ནས་བཙན་བྱོལ་བོད་མིའི་སྒྲིག་འཛུགས་ཀྱི་འོས་བསྡུའི་སྒྲིག་གཞི་དང་དེ་འབྲེལ་ལམ་སྟོན་ལག་ལེན་བསྟར་ཕྱོགས་ཚུལ་བཞིན་མིན་པའི་བསམ་ཚུལ་བཏོན་པའི་ཐད་གསལ་བཤད་མདོ་ཙམ་ཞུས་ན།
འདི་ག་འོས་བསྡུ་ལས་ཁང་ནས་བཙན་བྱོལ་བོད་མིའི་ཁྲིམས་བཟོ་ལྷན་ཚོགས་ཀྱིས་གཏན་འབེབས་གནང་བའི་འོས་བསྡུའི་སྒྲིག་གཞི་དང། ལྷག་པར་འོས་སྒྲིག་དོན་ཚན་ ༢༤ ནང་གསེས་ཁག་གི་འབྲུ་དོན་གསལ་བཀྲོལ་གྱིས་ལམ་སྟོན་ཕྱི་གསལ་ནང་གསལ་བྱས་ཡོད་པ་མ་ཟད། དོན་ཚན་དེའི་ནང་གསེས་དགུ་བའི་ནང་། “སྲིད་སྐྱོང་དང་། སྤྱི་འཐུས་ཀྱི་འོས་བསྡུ་ནམ་ཡིན་ལ་དབུས་འོས་བསྡུ་ལས་ཁང་ནས་འོས་གཞིར་ཞུགས་མི་དང། དེའི་རྒྱབ་སྐྱོར་བས་འོས་བསྡུ་དང་འབྲེལ་བའི་དྲིལ་བསྒྲགས་ཀྱི་འགྲོ་གྲོན་ཚད་གཞི་གཏན་འབེབས་དང་། རྩིས་ཁྲ་འབུལ་ཕྱོགས་དང་། དྲིལ་བསྒྲགས་བྱེད་ཕྱོགས་བཅས་ཀྱི་ལམ་སྟོན་ཁ་གསལ་བྱེད་དགོས།” ཞེས་པའི་འབྲུ་དོན་འོག ལམ་སྟོན་གནང་བ་དེས་སྨྲ་བརྗོད་དང་དྲིལ་བསྒྲགས། འདུ་འཛོམས་དང་ཁྱབ་བསྒྲགས་སོགས་གང་གི་རང་དབང་འཕྲོག་མེད་པ་མ་ཟད། རྒྱལ་སྤྱིའི་འགྲོ་བ་མིའི་ཐོབ་ཐང་དོན་ཚན་གང་ལ་ཡང་མི་མཐུན་པ་ཆགས་མེད།
འདི་ག་འོས་བསྡུ་ལས་ཁང་ལ་ཚོགས་པ་ངོས་ལེན་བྱེད་ཆོག་པའི་འགན་དབང་ཞིག་བཙན་བྱོལ་བོད་མིའི་ཁྲིམས་སྒྲིག་གང་ལ་མེད་པར་བརྟེན། བཀའ་སྤྱི་གཉིས་ཀྱིས་དེ་སྔ་ནས་ངོས་ལེན་གནང་ཟིན་པའི་ཚོགས་པ་བཅུ་གཅིག་པོ་སྒྲིག་འཛུགས་ཀྱི་ངོས་ལེན་ཡོད་པར་གཞི་བཞག་བྱས་པ་ཞིག་ཡིན་པ་ལས་འདི་ནས་གང་དྲན་གྱིས་སྐབས་འཕྲལ་ཐག་གཅོད་བྱས་པ་ཞིག་མིན་པ་མཁྱེན་ཆུབ་ཡོང་བ་ཞུ་རྒྱུ་ཡིན།
སྤྱིར་དབུས་འོས་བསྡུ་ལས་ཁང་ནི་འོས་སྒྲིག་ཁག་ལ་ལམ་སྟོན་གནང་མཁན་དང་། འོས་སྒྲིག་དང་འགལ་འདུ་བྱུང་ཚེ་ཐག་གཅོད་བྱེད་མཁན་ཞིག་ཡིན་པ་ལས། སྒྲིག་འགལ་གང་བྱུང་ལ་ཞུ་སྦྱོར་བ་དང་རྩོད་ལན་པའི་བྱ་བཞག་ལ་ཞུགས་མི་ཆོག་པ་ཁྲིམས་ལུགས་སྤྱིའི་འགྲོ་སྟངས་ཤིག་ཡིན་པ་མཁྱེན་དགོས་པའི་གནད་ཀྱི་དོན་པོར་ཡིན་པས་དེ་དོན་དགོངས་འཇགས་དང་།
ལར་ནས་བོད་མིའི་སྒྲིག་འཛུགས་ཀྱི་ཁྲིམས་སྒྲིག་ཁག་བཙན་བྱོལ་བ་ཞིག་གི་གནས་སྟངས་གཞི་ལ་བཞག་ཡོད་པ་ལས་རང་བཙན་ཡོད་པའི་མང་གཙོའི་ཁྲིམས་སྒྲིག་ཇི་བཞིན་བསྡུར་ཐབས་མེད་པ་ཞར་བྱུང་དུ་མཁྱེན་པར་མཛོད།
འབྱུང་འགྱུར་དེ་འབྲེལ་བསམ་ཚུལ་ཡོད་ཚེ་བརྒྱུད་ལམ་མང་པོ་འགྲོ་མ་དགོས་པར་ཐད་ཀར་འབྲེལ་ཡོད་ལས་ཁུངས་ཁག་ལ་འབྲེལ་གཏུགས་གནང་གལ་ཆེ་བ་བཅས་ཀྱི་གསལ་བཤད་དུ། དབུས་འོས་བསྡུ་ལས་ཁང་ནས། ཕྱི་ལོ་ ༢༠༡༥ ཟླ ༡༠ ཚེས ༢༦ ལ། །